العيال

ارقص ..

ارقص يا ورق الشجر ف الهوا بدلال

غنوة باسم الحياري العيال

كانوا العيال ..

جوا الحواري ..

لعب وأونطة ولا حد داري

كانوا ..

ولا الموج لو عشق ..

ما يقلق يا هوي ولا يداري

كانوا ..

اول ربيع بكري ..

شقشق بنور الورد جوا الحواري

كانوا عيال

الهبل فيهم بس مش اشكال

ما دام الحب نية حلال

حق الربيع يطرح غناوي

كبروا العيال ..

عرفوا القهاوي

واشتد عودهم

واخشن صوتهم

وبقينا نسمع منهم فتاوي

وصبح النسيم دخان

يزرع ف روحهم وهم الأمان

أحسن طبيب ..يسمع حكاوي ..

وشوف العيال ..

كبروا العيال ..

وكل عيل عنده شكاوي

أحد العيال ..قال كام سؤال

قال جينا امتي ؟ وليه ومنين ؟

وكمان هيبقي مصيرنا فين ؟

ومفيش ياعيني جواب يداوي

أحد العيال هجر البشر

وف نص صحرا زرعله شجر

وف ضله نام ..همه انبدر

والرمل صار لهمومه حاوي

وأحد العيال بص ف مرايته

ومشفش ميزة تثبت وسامته

والشك صاب ف عيونه قيمته

والقلب ترّب عالقهاوي

وشوف العيال ..

كبروا العيال

وكل عيل جواه بلاوي

أحد العيال صياد عتيد

والايد شابكها ف أي ايد

في العشق واحد م العبيد

والذل رزق لكل غاوي

وكتير عيال بكتير وجع

القهوة ملّت يا جدع

وكل فنجان فيه البدع

وكل سر عايزله حاوي

وشوف العيال ..

اه م العيال

أول ربيع زاره المطر

من دون خريف

دق الخطر

بارت قلوب

زادت عيوب

وتحت الغيوم..

دبل الشجر