اعتراف

حبيبتي ياللي ف جمالك ضي
وعنيكي نور
يا قمر بنّور
في كل حي
وكل شارع
بمشي فيه اسرح واصارع
الف حبل من المشانق
لَف قلبي وقلت أي
قلت أي قبل أما اشوفك
او اشوف اسمي ف حروفك
قبل ما يا حبيبتي الاقي
ان قلقي سببه خوفك
والقي قلبي مهوش وحيد
وان قلبك زي قلبي
برده ملفوف بالحديد
بس قلبي يا حبيبتي
ياما قبلك كان عبيط
ياما قبلك شاف حبايب
دوّقوه م الكاس صديد
ياما قام حلف انه تايب
قال وماله مكون وحيد
وانتي قلبك يا حبيبتي ..

لسة وردة مزهزهة
نجمة حلوة ف الجناين
مين له إيد توصلها !
انتي قلبك يا حبيبتي
كلمة حلوة انا قولتها
صورة حلوة رسمتها
لاقدرت يوم امضي باسمي
ولا حد قبلي شفّها
يبقي ليه ؟!
طاب قوليلي يا حبيبتي
طاب قوليلي ازاي وليه
تبقي زيي عالمشانق
ترفعي اعلام الحديد
تقفلي ف الوش بابك
ترفضي حبي الاكيد
هو انتي زيي يا حبيبتي
شفتي ضي الشمس ليل

والورود ذل الحبايب
والفراق صعب وجميل
ولا كنتي ف يوم وحيدة
تحت عتبة بيت قديم
تحت بند الاحتياطي
فوق تراب الكدابين !

دانتي وردة مزهزهة
ونجمة حلوة ف الجناين
مين يجيله القلب يقسي ؟
حتي لو في الاصل خاين

فا اسمحيلي يا حبيبتي
اعترفلك..
بسر تاني
بعد سري الاولاني
اللي هو اني بحبك
وفيكي انتي..
دبت دوب
سري هو يا حبيبتي
انك انتي ليا توب
هلبسه حتي الممات
وانسي بيه..
كل اللي فات
وتبقي جنبي يا حبيبتي
في السلام..
وف الحروب