يا ليل

يا ليل ميّل

وهل بنسايم بردك الدفيان

وضلل شمسنا بنسمة

تخبينا

ويرجع ضيّنا فينا

وتستر جرحنا المكشوف

وتدفن دمعنا فينا..

ف الجوف..

وتصبح روحنا لحم ودم

وجناحات..

فا تطير

ونشوف الكون ولا الاساطير

يا ليل فيك الدفا ..

والونس..

زي السرير

الروح تحبك.. وتشكيلك.. وتحكيلك

ايه اللي جرا والياما كان

ايه اللي كان

ف لحظة هوان

تسمحلي..

اعشق معاك البحر

واشكي.. لكن بشرط

ابكي لكن بشرط

تخفي جميع البشر

واشوف الرمل..

مد البصر

وارسم بغصن الشجر

ع الرمل آهة

واصرخ..

بكل تفاهة

زي الغجر

وبعد البكا والنوح

والصراخ والبوح

اضعف ..

واترمي عالرمل دايخ

واضحك..

والضحك..

يخرج مني بايخ

مليان انين

كما المجانين

واقوم وارقص من جديد زي الغجر

اقلع واغطيني ..

بأوراق الشجر

واغني

اغني

يمل الصبر مني

فا ابكي تاني

تمر أيام

ويفضل من جناني

جسمي الضعيف

وورقة مطوية

عليها رسمة طير

ونفس القصيدة ديا

وجملة كلها جنان

عشت حزين.. لكن فنان!