31 ديسمبر .
2 دقيقة قراءة .
569
رسالة من عصفور بالجنّة
اليوم سمعت عم تقولوا إنّي عصفور بالجنّة صرت
بس أنا مش هيك اخترت
أنا كنت مبسوط، بيكفي إنّي ملاك بقلب إمي کنت
عندي أحلام كتير بعد ما حقّقت
مبارح بالليل بكتير إشيا حلمت
إنّي عم طير وطيار قوي صرت
مهندس قد الدني تخرّجت
عكتافي نجمة مكلّلة علّقت
أصعب معزوفة لموزارت عزفت
ورسمة أحلى من الموناليزا رسمت
كنت مبسوط، ما بعرف ليش لهلق ما فقت
بالصدفة منكم سمعت، إنّي برصاصة طايشة متت
بتصدقوا؟! من كل قلبي ضحكت
لان مش هيك بمدرستي تعلّمت
الرصاصة ما عندا عقل، كيف بتكون طايشة
وبتضيّع الطريق؟
لا، انت يلي قوّصت- انت لي طايش وبدك حريق. مين قلك بدي موت ليش عني قرّرت
بعد في كتير العاب فيهن ما لعبت
مين قلك إنّي مستعجل حتی روح؟
وانت مين تتاخد مني الروح؟
مبسوط هيك دمعة إمي نزلّت
جاوبني إيه عم بحكي معك إنت
مبسوط دمّات بيي عفراقي نشفّت
شو استفدت؟ فشيت خلقك؟ ارتحت؟
صدق ما زعلت على رفقة جديدة بالسما تعرفّت
رفيقي متلي رصاصة طايشة أخدت منه روحه
وعروس بعدها ناطرا حبيبها الكذاب لوعدها وين ما راحوا يروحوا
ورجّال بعده حامل شهادة إبنه يلي صارت شهادة وفاة والسبب "متأثر بجروحه"
صار عندي رفقة كتير كتير
والكل من شقفة اسما لبنان
أنا صغير وما بعرف عنها كتير
كانوا عم يقولوا إنه حلو أخضر وصغير
جبل بحر تلج رقص ومشاوير
بس مشكلته صغيرة كتير
إنه في الكبير بياكل لصغير
والغني بیدعس عالفقير
والفوضى قانون بالواسطة بتصير
حلكم بقى تفيقوا ما عاد بكیر...
لأن بعد كم سنة من اليوم
الجنّة رح تنتلي عصافير.
#عمر_مزهر