مسلسلات رمضان ٢٠٢١

 بالرغم من انه حياتنا الها عشر سنين تقريبا مليانة بالحروب والموت والثورات والفقدان والتعاسة، إلا انه الحياة بتضل قادرة انها تفرض نفسها علينا. وبيبقى على طول في جانب آخر من حياتنا عم نعيشه طبيعي قدر المستطاع بسبب الكورونا يلي غيرت كتير من عاداتنا. لساتنا منروح على السوق ومنحضر تي في ومنعمل فولو لبلوغرز بكل انواعهن ومنطلب أكل من برا. لسة منهتم نتابع فوتبول واخبار الممثلين والفنانين ومنلحق الموضة ومنحب نتصور ونغير صور اكاونتاتنا.

من زمان بيستهويني تابع مسلسلات كتير برمضان بس كل ماكبرت كل ماخف هدا الاهتمام. السنة تابعت ٣ مسلسلات مصرية. أفكار جديدة وفيهن شي من واقعنا وهنن قصص ما حدا سلط الضوء عليهن من قبل.

العنوان الأبرز للمسلسلات اللي حضرتهن السنة برمضان هو الطفولة وتأثيرها علينا. اديش طفولتنا بتضل محفوظة جواتنا واديش كلام الاهل ممكن يغير مستقبلنا. كل شي منعمله بحياتنا ونحنا كبار هو رد فعل عن الشي يلي صار ومرينا فيه بطفولتنا. 

خلي بالك من زيزي مسلسل بيسلط الضوء على مرض اضطراب نقص الانتباه مع فرط النشاط والحركة، ويلي بيقولوا عنه بالانكليزي ADHD. بذكر أول مرة سمعت عن هالمرض كان من صديقة هولندية حكتلي عن اخوها انه مصاب فيه من وقت كانوا أطفال. فأنا سألتا باستغراب يعني هدا ايدز؟ ضحكت يوميتا رفيقتي وقالتلي لا هدا اضطراب سلوكي نفسي وبيتعالج عن طريق اختصاصيين. أثار فضولي هالمرض فتبحرت بالقراءة عنه على الانترنت لاكتشف انه عنا بسورية منشخص الحالة بأنه شقوة ومتل العفريت شاقق الأرض وطالع، وعادة يكون علاجه عنا بالضرب والعقاب والتوبيخ وما بجيب فايدة. 

زيزي (أمينة خليل) بتكتشف انها مصابة بهدا الاضطراب تزامنا مع الطفلة تيتو يلي بيكتشفوا أهلها انه سبب عفرتتها هو هدا الاضطراب نفسه. لما بتكتشف زيزي المرض يلي عندا بتبلش تعمل اسقاطات على حياتها لتكشف سبب غضبها الدائم وسبب اندفاعا انها تقول كلام للناس يلي حواليها وتئذيهن فيه بدون ما تفهم هي شو عملت. وليش ما بتقدر تركز بشي واحد؟ واديش صعب انها تنظم وقتها وتعرف تخطط ولو لشي بسيط كتير. ولما فكرت زيزي بطفولتها عرفت انه أهلها هنن السبب. أهل زيزي اعتبروا انه الله بعتلهن بنت عفريتة وشقوة وانهم ما عرفوا يربوها بالرغم من انه هنن استخدموا معها كل الوسائل الممكنة برأيهن ليربوها. حتى انها ما بتتذكر طفولتها الا بغرفة الغسيل عم تبكي وتصرخ لأنه أبوها حبسها فيها لساعات وامها ما عم تفتحلا الباب. كانت زيزي تخاف لأنه تفكر انهن حينسوها جوا لحد ما يجي أخوها على البيت ويسمع صوتا ويفتحلا الباب هو. زيزي كبرت وضلت خايفة من أهلها وما ترتاح معهن. كبرت وضلت خايفة تفوت على غرفة الغسيل. كبرت بدون ما تحس بالأمان. وما قدرت تحطم هالخوف لحتى خلع مراد ايد باب غرفة الغسيل وهداها ياها لزيزي. ويمكن ما كانت تجوزت هشام زمان لو هو ما ساعدها بالدراسة لتقدر تتخرج من الجامعة وحسسها بنوع من الأمان معه. ورجع سحب الأمان منها لما تخلى عنها بنوبة من نوبات غضبها بسبب خوفها انها حتفقد الفرصة بإنها تكون ام بعد ما فشلت عملية طفل الانبوب للمرة التالتة. خوف زيزي من كل شي كان عم يترجم لغضب، ولما قدرت تسحب الغضب يلي جواتا عن طريق ممارسة البوكسينغ ولما واظبت على جلسات العلاج النفسي وتدريبات تنظيم التنفس، بلشت زيزي تحس بباقي انفعالاتها يلي كانت متخبية تحت غضبها. صارت تقدر تصنف مشاعرها وتعرف تبكي وتضحك وتستمتع وتفكر وتحب. صارت تعرف الـ ADHD  وتقدر تميزه. زيزي فرحت باكتشافها لمرضها. علامات الرضا بينت عليها لانه عرفت هي ليش هيك كانت تعمل؟ لأنه لقت سبب لاختلافها، سبب هي ما دخلها فيه. سبب بعيد عن انها غبية او بليدة او عفريتة او خايبة او كسلانة. زيزي مبسوطة باختلافها واقتنعت انها من الناس الصيادين يلي بقيوا من الزمن القديم قبل ما يتحولوا معظم الناس ويصيروا مزارعين. 

بمسلسل ضد الكسر سلمى (نيللي كريم) البلوغر المشهورة ويلي بتابع وصفاتها وحياتها ميات الالاف من المتابعين ويلي بينتظروها تورجيهن حياتها الحلوة السعيدة المثالية كانت عم تعيش واقع مختلف تماماً عن يلي بنشوفه بكاميرة موبايلها. سلمى كانت كل الوقت خايفة الناس تعرف حقيقة حياتها.

ملك اخت سلمى الوسطى بتحمّل الام مسؤولية كل اغلاطها يلي عملتهن بحياتا بداية من حملها غير الشرعي من حبيب سري انتهاء بزواجها من ابن الجيران ونسبت الطفل إله عأساس انه ابنه. بتقلا ملك لامها انت السبب لأنك اعتبرتي سلمى هي الافهم والاذكى والاحلى، وبقيتي شايفتيها هيك مع انه نحنا كمان مناح. واختها الصغيرة بتقلا لسلمى انت عيشتيني ببيتك مشان تحافظي على برستيجك وتسجليني بجامعة خاصة متل ولاد رفقاتك وتتفشخري فيني. ولما سلمى مرة منعتها تعمل شي كانت لح تموتها بعد مادفشتها ووقعتها على راسها وفاتت سلمى بغيبوبة على أثرها. وخوف سلمى انه الناس تعرف مكر رفيقتها المقربة واديش بتكرها وعم تجرب تحطملا حياتا لتنتقم منها لأنها اخدتلا حب حياتا كريم خلاها تضل تحكي عنها بكل فيديوهاتها وعن صداقتهم. وخوف سلمى انه الناس تعرف انه زوجا كريم خانا مع اخت رفيقه بالرغم من قصة الحب الكبيرة يلي كانت بيناتهن خلاها تعمل حالها مو منتبهة. كل هدا الخوف تحول فجأة عند سلمى لبركان انفجر بوجه الكل ولحتى قالتلهن روحوا حلوا مشاكلكون بعيد عني.

هنا (منى زكي) بواحد من المشاهد المهمة جدا بمسلسلها الرمضاني لعبة نيوتن قالت للقاضية بالمحكمة بأميركا انه كل شي عملته بحياتا كان سببه الخوف. كل الوقت هي خايفة من الفشل. خايفة من امها يلي بتضل شايفتها انها البنت الفاشلة. خافت يمر الزمن وتكبر اكتر وما تلحق تجيب ولاد. خافت تضل عم تضطر تعمل عمليات تلقيح اصطناعي وما تنجح العملية. خايفة من زوجا حازم وقت يعرف انها لح تخسر ابنهن بسبب سوء تصرفها. خافت منه لدرجة قررت انها ما تحكي معه ابدا خلال هالفترة. خافت من الغربة لأنها كانت لوحدها بمكان جديد وغريب وما بيشبه بيئتها المتعودة عليها والناس بيحكوا لغة ما بتتقنها وما في وسيلة تواصل مريحة. خايفة من بيئة  زياد "بيج زي" وحياته الغامضة يلي كانت تشوفا بالافلام بس، وفضلت تعيش ببيت مؤنس بالرغم من معرفتها انه بيحبها وبدو ياها. حتى وقت كانوا يفيقوها تصلي صلاة الفجر حاضر معهن كانت تخاف تقلهن ما بدي فيق صلي معكون لاني تعبانة. هنا خافت ما تلحق تجيب ولد حتى بدون ما تفكر إذا هي بتقدر او بتعرف تكون أم. وفكرت انه تجيب ولد بأمريكا هو انتصار بحد ذاته. انتصار الها قبل ما يكون شي عم تعمله لمستقبل ابنها. راحت تواجه العالم بدون ما تكون مقوية حالها بثقافة عن قوانين هالبلد يلي رايحة تولد فيه. لمّا أخدوا منها ابنها بالمستشفى ليحطوه بالحاضنة ما فهمت وخافت، خافت يبدلوه بولد تاني. ولما هددتهن انها لح تقتل حالها إذا ما بيعطوها الولد خافوا على الولد منها وهي خافت من خوفهن منها. حتى وقت قبلت عرض الزواج من مؤنس قبلت لأنها كانت خايفة ترفضه وما يضل عم يساعدها. ووقت تحججت بالرفض قالت لأنها خايفة على مشاعر سارة زوجة مؤنس الأولى. وقبلت انها تتحجب بسبب وضعه لمؤنس كداعية إسلامية بالولاية لانها خافت تقله لا ما بدي. ولأنها خافت مؤنس يقرب عليها وياخد حقه الشرعي منها صارت تتحجج بورقة طلاقها من حازم. وبس حصلت على ورقة الطلاق خافت مؤنس يعرف بالورقة ويجبرها على شي ما بدها ياه. الخوف يلي بلش صغير وقت الطفولة كبر مع هنا وصار غول عم ياكل حياتها ويدمرها بدون ماتنتبه على حالها. والحظ لعب لعبته مع هنا لأنه طلع نفس الغول عايش مع حازم ومؤنس كمان. كل واحد منهن عندو غول عم يحطمه وياكل حياته. لهيك وقت تواجهت حياتهن مع بعض دمروا بعضهن لأنه هنن الثلاثة كانوا محتاجين لحدا يعرف يزيح الخوف من طريقهن ويطمنهن. 

وقت تقرروا تجيبوا ولاد سألوا حالكون إذا كنتو جاهزين تكونوا أهل؟ ولاتنسوا توزعوا حبكم على كل ولادكون بالتساوي. واحكولهن ليش انتو بتحبوهن واحضنوهن واغمروهن. وحتى لو طفلك/تك عندوا أي نوع من أنواع الاضطرابات هو لح يبقى طفلك/تك وفيك تستمد منهن الحب والطاقة يلي حتحتاجها لتقدر تكمل طريقك معهن. ولا تخجلوا تسألوا حدا مختص، إذا ما سألت بعمرك مالح تعرف. وحاولوا تشوفوا الحياة يلي ورا زوايا الكاميرا وبرا إطار الصورة لأنه الواقع هنيك. وبس تخافوا تذكروا انه نحنا محتاجين بس نخلع ايد باب غرفة الغسيل لنحس بأمان.